Edgar Cosío. Libru de El Carmín 2022
D. Juan Rodríguez García tomó posesión per vez primera de l’alcaldía de Siero, el 1 de xunetu de 1909, la industria sidrera taba perbién asentada tanto en La Pola como nel conxuntu del conceyu. Asina, pue servir de referencia’l datu que nos da Fausto Vigil nes Notas para una monografía de Siero – Asturias: nel añu 1900 había en Siero 110 fábriques dedicaes a la producción de sidra. Ye de suponer que parte d’elles sedríen de caráuter familiar y non industrial, pero’l númberu d’anuncies nel Anuario del comercio, de la industria, de la magistratura y de la administración del añu 1909 tampoco yera menor; un total de 48 fábriques de sidra repartíes nes parroquies d’Aramil (2), Carbayín (3), Collao (3), Feleches (2), Granda (3), Hevia (2), La Carrera (5), La Collá (1), Llugones (3), Marcenao (1), Samartindianes (2), Samartino (2), Santolaya (1), Valdesoto (8) amás de 10 en La Pola – les d’Alfredo Canteli, Joaquín Díaz, Juan Fernández Rosa, Manuel Fonseca, Ramón Miranda, Herederos de Cipriano Martínez, Robustiano Martínez, Lesmes Nosti, José Antonio Rodríguez y Manuel Rodríguez. Y hai que tener tamién en cuenta que nun s’amuesen dalgunes como les d’Andres Corzo (de Granda, 1889), Juan Rodríguez (de Tiñana, 1885), Casa La Morena (Viella, llagar en funcionamientu más antiguu d’Asturies), Rafael Bayón (de Llimanes, 1857) o Joaquín Palacio (de Tiñana, 1864); toes elles furrulando tovía anguaño, cerca de 150 años dempués d’abiertes.
Cuasi con toa seguridá esta importancia del mundu sidreru nel ámbitu llocal foi la que movió al alcalde Rodríguez a entamar nes Cases Consistoriales de Siero, malpenes un mes dempués de llegar al cargu, un conceyu que tuvo repercusión nacional – con reseñes por exemplu nel diariu madrilanu La Época – y que-y valió al propiu alcalde non pocos afalagos, como los que-y dedicaba El Comercio de Xixón que dicía d’él que yera «un alcalde asturiano modelo, hombre de grandes iniciativas y entusiasmos». Asina, el 8 d’agostu de 1909 alcontrábense en La Pola Siero más de 80 persones en representación de los conceyos asturianos, les cámares de comerciu, los sindicatos agrícoles, los cosecheros y productores de sidra, y la corporación sierense en plenu. Desta xunta diba salir una comisión executiva presidida por D. Luis Vereterra a la que se-y encomendaba, ente otres xeres tocante al comerciu de la mazana y la sidra, que pidiera «al Excmo. Sr. Ministro de la Gobernación, que se exceptúe del descanso dominical las sidrerías ó sean los establecimientos donde se expenda exclusivamente sidra, aquiparándoles á los cafés y cervecerías. En último extremo, que se conceda la venta de la sidra en cervecerías y cafés».
P’atopar el porqué de la pitición y sobre too, la razón pola que les sidreríes taben obligaes a descansar en domingu, hai que dir unos años más p’atrás. Cuando en marzu de 1904 les Cortes españoles aprobaron la Ley del 1º de marzo de 1904 sobre el descanso en domingo y nel mes d’agostu del mesmu añu se publicó la primer versión del reglamentu que la diba desendolcar, les crítiques nun se ficieron esperar. Estes llegaron especialmente dende seutores al rodiu del Partíu Lliberal, opositor al gobiernu del conservador Antonio Maura. A mou d’exemplu, la edición del 1 d’ochobre del diariu El Liberal publicaba dellos testimonios de lo que se suponía que de negativo traxera la llei:
- «¿Que qué hice el domingo? Pagar a mis tres dependientes el jornal, 30 reales próximamente, y mandarlos a descansar (…)»
- «Nos cierran las bibliotecas y nos abren las tabernas. Si no queremos jugar y perder unas pesetas, ó hemos de beber unas copas ó aburrirnos»
- «(…) mi marido se bebía durante la noche de trabajo una botella de vino, pero fuera del trabajo siempre estaba con nosotros y el domingo lo pasábamos juntos haciendo algún extraordinario. Ahora (…) se reúne con sus amigos desde bien temprano y ya no le vemos en todo el día, gastándose todo lo que nos hace falta para vivir (…)».
Como se ve, les crítiques de la patronal veníen del fechu de tener que paga-y el salariu del día de descansu a la plantilla, mientres que les de la clase trabayadora centrábense na falta d’alternatives d’ociu – la xente, acostumada a diario a xornaes llaborales d’ente 12 y 18 hores, nun sabía qué facer – y sobre too que cuasi la única salida fuera metese nel chigre o la taberna, pues almitíense como esceición a la prohibición de trabayar en domingu les fondes, los cafés, los restaurantes y les cases de comides.
Podría pensase qu’estes crítiques nun yeren mayoritaries y que tres d’elles taba l’ínterés de la oposición política en desgastar al gobiernu, pero’l fechu foi que recibiéronse un númberu talu d’istancies nel Ministerio de la Gobernación qu’esti viose forzáu a espublizar en febreru de 1905 una llista provisional de más de cincuenta actividaes que se sumaben a les esceiciones a la llei yá contemplaes. Y el reglamentu definitivu aprobáu n’abril del mesmu añu nun solo confirmaba lo yá dispuesto, sinón que matizaba que si
bien se permitía l’apertura y el trabayu nos establecimientos destinaos a la venta al por menor d’artículos de comer, beber «y arder» quedaben específicamente escluyíes d’esti grupu les tabernes.
Y en tou esti procesu, el problema pal seutor de la sidra foi que direutamente lu escaecieron. Permitióse una esceición pa les fábriques de cerveza ya igualóse a les cerveceríes colos cafés, pola menor graduación alcohólica d’aquella bebida frente al vinu. Pero nun se fizo lo mesmo colos llagares y sidreríes, que quedaron al par que les tabernes – entendíes estes como establecimientos onde se vendía al por menor principalmente vinu. Pero lo que ye peor, tampoco se rectificó. Asina les resoluciones de reclamaciones, como una de 1908 de los cosecheros y vendedores de sidra de Guipúzcoa, nun entraron al fondu del asuntu.
Esta yera la situación cuando tuvo llugar l’ensame polesu y la pequeña rebelión entamada nel nuesu conceyu escontra’l descansu dominical, qu’amás nun foi na más meritoria pola defensa que supunxo pa tol seutor de la sidra o pol consensu al rodiu d’ella qu’algamó, sinón tamién porque surdió d’un alcalde conservador nun momentu nel que’l gobiernu d’España yera del so mesmu partíu, toa vez qu’asocedió mentanto’l conocíu como “gobiernu llargu” de Maura – que va de xineru de 1907 a ochobre de 1909.
Anque’l detalle del procesu entemedies de xuru superaría’l cometíu d’esti escritu, sicasí ye xusto comentar que l’ésitu tardó, pero acabó por algamase. El 25 d’abril de 1924, la Gaceta de Madrid – diariu oficial, predecesor del BOE – publicaba una Real Orden atendiendo la súplica d’una «Comisión de agricultores, lagaderos y expendedores de sidra de la provincia de Asturias» y reconociendo por fin que «la sidra, dada su baja graduación alcohólica, es más asimilable, por sus efectos, sobre la fisiología humana, a la cerveza que al vino, aguardiente o licores, y, por lo mismo, es de justicia que a las sidrerías no se las asimile a las tabernas, sino a los bares, que expenden, sobre todo, líquidos hidroalcohólicos y mariscos, pero debiéndose adoptar medidas severas para evitar que las sidrerías se conviertan en tabernas disfrazadas». Venti años dempués d’aprobada la llei y quince tres de revolvese l’alcalde de Siero y plantase en La Pola la semiente de la protesta.
